ბათუმის საკრებულოში დღეს გამართულ საფინანსო და ეკონომიკური განითარების კომისიის სხდომაზე კომისიის წევრებმა 2013 წლის 21 სექტემბერს, ქ. ბათუმში ზ. გამსახურდიას ქ.N11-ში მომხდარი ხანძრის შედეგად დაზარალებული პირების საცხოვრისით უზრუნველყოფის მიზნით გასატარებელ ღონისძიებებზე იმსჯელეს. 2013 წლის 21 სექტემბერს ძველ ბათუმში ზ.გამსახურდიას ქ.N-11-ში ხანძრის შედეგად დაიწვა 221 კვ.მ მიწის ნაკვეთზე მდებარე სამსართულიანი საცხოვრებელი სახლი და საცხოვრისის გარეშე დარჩა ცხრა ოჯახი. აჭარის ავტონომიური რესპუბლიკაში სტიქიური მოვლენების შედეგად მიყენებული ზარალის სალიკვიდაციო შერეული სამთავრობო კომისიის 2014 წლის 02 მაისის N-2 საოქმო გადაწყვეტილებით, თვითმმართველ ქალაქ ბათუმის მერიას გამოეყო 45 000 ათასი ლარი მითითებულ ოჯახებზე გადასაცემად და ასევე, მიეცა რეკომენდაცია ხანძრის შედეგად განადგურებული სახლის რეაბილიტაციისათვის ინვესტორთა მოზიდვის ან ძველი ბათუმის პროექტის ფარგლებში სახლის აღდგენის თაობაზე. თუმცა აღნიშნული სახლის აღდგენა ვერ განხორციელდა და ამ მიზნით ვერც ინვესტორი იქნა მოძიებული. საჯარო და კერძო ინტერესების დაცვის პრინციპის გათვალისწინებით, მიზანშეწონილობიდან გამომდინარე, ქალაქ ბათუმის მუნიციპალიტეტის მერიის მიერ დაზარალებულ პირებთან გამართული მოლაპარაკებების შედეგად მიღწეულ იქნა შეთანხმება, რომ ზ.გამსახურდიას N-11-ში მდებარე დამწვარ სახლში არსებული, მათ საკუთრებად რეგისტრირებული საცხოვრებელი ფართების დათმობის სანაცვლოდ, დაზარალებულებს საკუთრებაში გადაეცემათ ქალაქ ბათუმის მუნიციპალიტეტის საბინაო ფონდში რიცხული ბინები (შეთახმდა კონკრეტული ფართები), ამასთანავე მიეცემათ რემონტის თანხები - 1 კვ.მ 250 ლარის ოდენობით, საკუთრებაში გადასაცემი იმ ბინებისათვის, რომლებიც საჭიროებენ რემონტს, ხოლო ერთ-ერთი დაზარალებულს დამატებით მიეცემა 5,81 კვ.მ საბაზრო ღირებულება კომპენსაციის სახით. 

როგორც სხდომაზე ითქვა, დაზარალებულებზე საცხოვრებელი ბინების სარემონტო სამუშაოებისათვის გაიცემა თანხა, ჯამში 107 ათასი ლარის ოდენობით. აღნიშნული თანხები კი გათვალისწინებული იქნება ქალაქ ბათუმის მუნიციპალიტეტის 2018 წლის ბიუჯეტში, რა მიზნითაც დაგეგმილია შესაბამისი ცვლილებების შეტანა ქ. ბათუმის მუნიციპალიტეტის საკრებულოს 2017 წლის 26 დეკემრბის N-41 დადგენილებაში. კომისიის წევრებმა წარმოდგენილ საკითხს მხარი დაუჭირეს და მისი განხილვა საკრებულოს რიგგარეშე სხდომაზე მიზანშეწონილად მიიჩნიეს.
კომისიამ, ასევე, იმსჯელა ფრაქცია „ერთიანი ნაციონალური მოძრაობის“ მიერ კომისიის სხდომაზე წარმოდგენილი საკითხის „საბავშვო ბაღების პედაგოგთა და თანამშრომელთა შრომის ანაზღაურების მინიმუმ 100 ლარით გაზრდის თაობაზე წინადადების მოწონების შესახებ“. კომისიის წევრთა უმრავლესობამ, წარმოდგენილი საკითხის საკრებულოს სხდომაზე განხილვას მხარი არ დაუჭირა, ვინაიდან, როგორც მერიის საფინანსო სამსახურის უფროსმა არჩილ ვანაძემ კომისიის სხდომაზე განაცხადა, მერიის მიერ უკვე მიღებულ იქნა გადაწყვეტილება და თებერვლის თვიდან საბავშვო ბაღის თანამშრომლები 20 პროცენტით გაზრდილ ხელფასებს მიიღებენ. არჩილ ვანაძის განცხადებით, ზრდა არის 60-დან 80- ლარამდე. „საბავშვო ბაღის აღმზრდელის ხელფასი განისაზღვრა დარიცხვით ხუთასი ლარის ოდენობით, თუმცა ეს ზრდა არ არის საბოლოო. მიმდინარე წელს კიდევ იგეგმება საბავშვო ბაღის თანამშრომელთა შრომის ანაზღაურების გაზრდა. კონკრეტული ზრდის ოდენობა განსაზღვრული იქნება საბიუჯეტო პარამეტრების შესაბამისად. უახლოეს საკრებულოს სხდომაზე ქ. ბათუმის მუნიციპალიტეტის მერია გეგმავს, საკრებულოს შესთავაზოს კონკრეტული წინადადებები, თუ როგორ მოხდება ბაღის თანამშრომელთა შრომის ანაზრაურების გაზრდა და რამდენი პროცენტით“, - განაცხადა არჩილ ვანაძემ.
სხდომას საფინანსო და ეკონომიკური განვითარების კომისიის თავმჯდომარე ზურაბ ნაკაიძე უძღვებოდა.