ბათუმის საკრებულოს გადაწყვეტილებები:
საკრებულომ 2025 წლის ბიუჯეტში ცვლილებები შეიტანა, რომლის მიხედვითაც ქალაქის ბიუჯეტის გადასახდელები 54 მილიონი ლარით გაიზარდა. ცვლილებებით განხორციელდა მისაღები შემოსულობების და გასაწევი გადასახდელების ნუსხის დამტკიცება საბიუჯეტო კლასიფიკაციის შესაბამისად, კერძოდ, ცვლილება შევიდა ბიუჯეტის როგორც შემოსულობებსა და ნაშთის ცვლილებაში, ასევე გადასახდელების ცალკეულ პროგრამებში/ქვეპროგრამებში. მიღებული გადაწყვეტილებით, საბიუჯეტო რესურსები ოპტიმალურად გადანაწილდა პრიორიტეტულ სფეროებზე, მათ შორის, განათლების, ჯანდაცვისა და ინფრასტრუქტურის განვითარების მიმართულებით.
საკრებულომ ცვლილება შეიტანა ქალაქთმშენებლობითი ღონისძიებების გეგმის - ქალაქ ბათუმის მუნიციპალიტეტის ტერიტორიაზე ავარიული მრავალბინიანი საცხოვრებელი სახლების ჩანაცვლების წესში. ცვლილებების მიღება განაპირობა საკრებულოს მიერ დამტკიცებული ავარიული მრავალბინიანი საცხოვრებელი სახლების ჩანაცვლების წესის მოქმედების პერიოდში გამოკვეთილმა რიგმა საკითხებმა, რომელთა გადაწყვეტა საჭიროებდა დამატებითი პირობების განსაზღვრას. შესაბამისად, მიღებული განკარგულების პუნქტებით დანართი 1 და დანართი 2 განახლებული რედაქციით ჩამოყალიბდა.
ცვლილებები შევიდა ქალაქ ბათუმის მუნიციპალიტეტის საკუთრებაში არსებული საპრივატიზებო ობიექტების ნუსხასა და პრივატიზაციის გეგმაში - მუნიციპალიტეტის საკუთრებაში არსებულ საპრივატიზებო უძრავ ობიექტთა ნუსხას კორექტირების შემდეგ დაემატა ექვსი ობიექტი, ხოლო უძრავი ქონების პრივატიზების გეგმას - ერთი ობიექტი.
საკრებულომ მუნიციპალიტეტის საკუთრებაში არსებული, ქ. ბათუმში, თამარ მეფის გამზირი N51-ში, მე-2 სართულზე მდებარე N5 ბინა აჭარის ავტონომიურ რესპუბლიკას უსასყიდლოდ, საკუთრებაში გადასცა. აღნიშნული ფართის აჭარის ავტონომიურ რესპუბლიკაზე გადაცემა განხორციელდა ,,სახელმწიფოს/აჭარის ავტონომიური რესპუბლიკის/ადგილობრივი თვითმმართველობის საკუთრებაში არსებული და ფიზიკური პირების მიერ საცხოვრებელ სადგომად გამოყენებული საცხოვრებელი და არასაცხოვრებელი ფართების შემსწავლელი შერეული სამთავრობო კომისიის“ რეკომენდაციის შესაბამისად, შემდგომში იქ მცხოვრებ მოქალაქეებზე საკუთრების უფლებით გადაცემის მიზნით.
საკრებულომ თანხმობა მისცა ქალაქ ბათუმის მერს საზოგადოებრივი სივრცის სასყიდლიანი სარგებლობის უფლებით პირდაპირი განკარგვის წესით გაცემასთან და გაცემის საფასურის განსაზღვრასთან დაკავშირებით. ასევე, დაამტკიცა საკრებულოს განკარგულების პროექტი, რომელიც ქალაქ ბათუმის მუნიციპალიტეტის საკუთრებაში არსებული სარგებლობის უფლებით, აუქციონის წესით სარგებლობაში განსაკარგი ქონების (მიწის ნაკვეთი და მასზე განთავსებული პანორამული ბორბალი) საწყისი წლიური სარგებლობის საფასურის განსაზღვრას ითვალისწინებს, შემდგომი განკარგვის მიზნით.
საკრებულომ დაადგინა საქართველოს სივრცის დაგეგმარების, არქიტექტურული და სამშენებლო საქმიანობის კოდექსით გათვალისწინებული განაშენიანების ინტენსივობის კოეფიციენტის გადამეტებისა და მრავალბინიანი საცხოვრებელი სახლის ფუნქციის საგამონაკლისო წესით გამოყენების შემთხვევაში მაკომპენსირებელი ღონისძიებების განსაზღვრის წესი; ასევე, დააზუსტა მუნიციპალიტეტის კონკრეტული უფლებრივი ზონირების რუკის (განაშენიანების რეგულირების გეგმის ზონირების ნაწილი) ნაწილში რეგლამენტის ტექსტი; ტექნიკური ხასიათის ცვლილება შეიტანა „ქალაქ ბათუმის მუნიციპალიტეტის ტერიტორიაზე არსებულ ბულვარში, პარკში, სკვერში მოტოციკლით, კვადროციკლით და ელექტრომობილით (ელექტროტრანსპორტით) გადაადგილების წესის დამტკიცების შესახებ“ საკრებულოს 2019 წლის 5 მარტის №4 დადგენილების ნაწილის მოქმედების შეჩერების თაობაზე“ საკრებულოს დადგენილებაში; დაამტკიცა ქალაქ ბათუმში რამდენიმე მისამართზე წარმოდგენილ გეგმარებით ერთეულზე განაშენიანების დეტალური გეგმები და დეტალური გეგმის კონცეფციები; ასევე, მუნიციპალური მნიშვნელობის პროექტის განხორციელების მიზნით, რამდენიმე საპროექტო ტერიტორიაზე დაამტკიცა საქართველოს კანონით „საქართველოს სივრცის დაგეგმარების, არქიტექტურული და სამშენებლო საქმიანობის კოდექსით“ გათვალისწინებული დროებითი ხელშემწყობი ღონისძიებები, რომელთა სარგებლობის სანაცვლოდ, საპროექტო ტერიტორიაზე არსებული ნაკვეთების ნაწილი, მშენებლობის ნებართვის აღებამდე, უპირობო და გამოუხმობი სერვიტუტით დაიტვირთება ქალაქ ბათუმის მუნიციპალიტეტის სასარგებლოდ. გარდა ამისა, „საქართველოს სივრცის დაგეგმარების, არქიტექტურული და სამშენებლო საქმიანობის კოდექსი“-ს 141–ე მუხლის 25-ე პუნქტის შესაბამისად, შენობა-ნაგებობის გაზრდილი ფართობის არანაკლებ 10%-ისა სასარგებლო ფართობის სახით დარეგისტრირდება ქალაქ ბათუმის მუნიციპალიტეტის საკუთრებაში.
საკრებულომ ძალადაკარგულად გამოაცხადა „ავარიული სახლის ჩანაცვლების პროგრამის ფარგლებში კანონით განსაზღვრული დროებითი ხელშემწყობი ღონისძიებების დამტკიცების შესახებ“ ქალაქ ბათუმის მუნიციპალიტეტის საკრებულოს 2024 წლის 9 აგვისტოს Nგ-15.152422216 განკარგულება. კომპანია შპს „ჯი ემ ბილდის“ განცხადებით, შეთანხმების სტადიაზე პროექტის პარამეტრებმა ვერ დააკმაყოფილა კანონმდებლობით დადგენილი მოთხოვნები (პარკირება და სხვა), რის გამოც განმცხადებელმა მოითხოვა განკარგულების გაუქმება და ავარიული სახლის ჩანაცვლებისათვის სხვა შეღავათების გამოყენება, რაზეც მიმდინარეობს წარმოება ქალაქ ბათუმის მუნიციპალიტეტის მერიაში.