დღეს ცნობილი ქართველი პოეტი, მწერალი და პედაგოგი ზურაბ გორგილაძე 86 წლის გახდებოდა. ბათუმის საკათედრო ტაძარის ეზოში შეკრებილმა მეგობრებმა, ახლობლებმა , ხელისუფლებისა და საზოგადოების წარმომადგენლებმა კიდევ ერთხელ გაიხსენეს ზურაბ გორგილაძის უკვდავი შემოქმედება და მის ხსოვნას პატივი მიაგეს.
ზურაბ გორგილაძის პირველი წიგნი "ნედლი სალამური" 1961 წელს დაიბეჭდა. ავტორია პოეტური კრებულებისა: "დიდი თვალები" (1964), "ლირიკული პოემები" (1969), "ზღვიდან აკრეფილი კენჭები" (1970), "ლექსები" (1973), "ჩაღმა ჩაყრილო ვენახო" (1975), "სინაზე" (1977), "ლირიკა" (1979), "მოფერება" (1984), "ხატიმამული (1995), "ოჰოი ნანა" (1997) და სხვა; ლექსების ძირითადი თემატიკაა სიყვარული, აჭარის ისტორიული წარსული და პოეტის მშობლიური კუთხის მკვიდრთა სულიერი სამყარო; მის სიცოცხლეში გამოიცა 16 წიგნი, ხოლო გარდაცვალების შემდეგ – სამი. 2008 წელს გორკის (შემდგომ იბერიის) ქუჩას მიენიჭა ზურაბ გორგილაძის სახელი. ზურაბ გორგილაძე იყო აჭარის უზენაესი საბჭოს ორი მოწვევის დეპუტატი. 1997 წელს დაჯილდოვდა ღირსების ორდენით. მიღებული აქვს საქართველოს მწერალთა კავშირისა და მემედ აბაშიძის სახელობის სახელმწიფო პრემიები.
ზურაბ გორგილაძე 2006 წელს, 68 წლის ასაკში გარდაიცვალა.