ინფრასრტუქტურის განვითარების კომისიის სხდომა

ბათუმის საკრებულოში ინფრასრტუქტურის განვითარების კომისიის სხდომა გაიმართა. 

სხდომაზე კომისიის წევრებმა ბათუმის 2025 წლის ბიუჯეტში შესატანი ცვლილებები განიხილეს. წარმოდგენილი პროექტის მიხედვით, ხორციელდება ქალაქ ბათუმის მუნიციპალიტეტის შემოსულობების და გასაწევი გადასახდელების ნუსხის დამტკიცება საბიუჯეტო კლასიფიკაციის შესაბამისად, კერძოდ ცვლილება შედის ბიუჯეტის როგორც შემოსულობებში, ასევე გადასახდელების ცალკეულ პროგრამებში/ქვეპროგრამებში. 
წარმოდგენილი პროექტი ითვალისწინებს რესურსების ოპტიმალურ გადანაწილებას სხვადასხვა სფეროებზე, რაც საბოლოო ჯამში გააუმჯობესებს ქ. ბათუმის მოსახლეობის სოციალურ-ეკონომიკურ მდგომარეობას.

ცვლილებები შედის საგზაო ინფრასტრუქტურის რეაბილიტაციისა და კაპიტალური მშენებლობის, სანიაღვრე სისტემების რეაბილიტაციისა და მოვლა-პატრონობის, ბათუმში კომუნალური ინფრასტრუქტურის დაწესებულებათა რეაბილიტაციის პროექტის თანადაფინანსების, ბინათმესაკუთრეთა ამხანაგობების მხარდაჭერისა და საცხოვრებელი პირობების გაუმჯობესების, მუნიციპალური სასაფლაოების მოვლა-პატრონობის, საპროექტო-სახარჯთაღრიცხვო დოკუმენტაციის შედგენის, კვლევისა და ექსპერტიზის, ქალაქის გაფორმების ღონისძიებების, პარკების, სკვერებისა და მოედნების ინფრასტრუქტურის რეაბილიტაციისა და მშენებლობის, ქალაქის გამწვანების ღონისძიებების დაფინანსებაში. 

კომისიამ იმსჯელა ,,ქალაქ ბათუმში, ანდრია პირველწოდებულის ქუჩის I ჩიხის N16ა-ში მდებარე მიწის ნაკვეთზე (ს/კ N05.36.24.934) წარმოდგენილ გეგმარებით ერთეულზე განაშენიანების დეტალური გეგმის დამტკიცების შესახებ” საკრებულოს 2025 წლის 31 ივლისის დადგენილებაში ცვლილების შეტანის თაობაზე.  აღნიშნული დადგენილებით,  ქალაქ ბათუმში, ანდრია პირველწოდებულის ქუჩის I ჩიხის №16ა-ში მდებარე მიწის ნაკვეთზე წარმოდგენილ გეგმარებით ერთეულზე  დადგენილების მე-2 მუხლით განისაზღვრული იყო მაკომპენსირებელი ღონისძიებები, რომელიც ეკისრებოდა დაინტერესებულ პირს განაშენიანების ინტენსივობის კოეფიციენტის გადამეტების შემთხვევაში. განსახილველ შემთხვევაში კი არ ხორციელდება განაშენიანების ინტენსივობის კოეფიციენტის გადამეტება,  შესაბამისად, დადგენილება მაკომპენსირებელი ღონისძიებების განსაზღვრას არ საჭიროებს.

ცვლილებები შედის „ქალაქ ბათუმის მუნიციპალიტეტის ტერიტორიაზე საქართველოს კანონით „საქართველოს სივრცის დაგეგმარების, არქიტექტურული და სამშენებლო საქმიანობის კოდექსით“ განსაზღვრული დროებითი ხელშემწყობი ღონისძიებისა და საკომპენსაციო ღონისძიების გამოყენების და ამ კანონით გათვალისწინებული სათათბირო საბჭოს საქმიანობის წესის დამტკიცების შესახებ“ საკრებულოს 2022 წლის 19 ივლისის დადგენილებაში. პროექტის მიხედვით წესში იცვლება ავარიული სახლის (მასზე დამაგრებული მიწის ნაკვეთის) ცნება, რომლითაც ზუსტდება ხელშემწყობი ღონისძიების გამოყენების პირობები.

სხდომაზე განიხილეს „მუნიციპალური მნიშვნელობის პროექტის განხორციელების მიზნით საქართველოს კანონით „საქართველოს სივრცის დაგეგმარების, არქიტექტურული და სამშენებლო საქმიანობის კოდექსით“ გათვალისწინებული დროებითი ხელშემწყობი ღონისძიებების დამტკიცების შესახებ“ ქალაქ ბათუმის მუნიციპალიტეტის საკრებულოს განკარგულების პროექტი. კერძოდ, პროექტის მიხედვით, შპს „ბათომი დეველოპმენტი“  საპროექტო ტერიტორიაზე,  ხელშემწყობი ღონისძიების ფარგლებში, ფუნქციური ზონით და მისი რეგლამენტით გათვალისწინებულისგან განსხვავებული პირობებით, გეგმავს მრავალბინიანი საცხოვრებელი სახლის მშენებლობას. პროექტში აღნიშნულია, რომ შენობა-ნაგებობის გაზრდილი ფართობის არანაკლებ 10%-ისა სასარგებლო ფართობის სახით დარეგისტრირდება ქალაქ ბათუმის მუნიციპალიტეტის საკუთრებაში, ხოლო  დროებითი ხელშემწყობი ღონისძიებებით სარგებლობის სანაცვლოდ, ქალაქ ბათუმში, ბაგრატიონის ქუჩა N127-ში 337.00 კვ.მ. არასასოფლო-სამეურნეო დანიშნულების მიწის ნაკვეთსა და ბაგრატიონის ქ. N127-ის მიმდებარედ 664.00 კვ.მ.  არასასოფლო-სამეურნეო დანიშნულების მიწის ნაკვეთზე მოეწყობა რეკრეაციული სივრცე - სკვერი.

კომისიის სხდომაზე წარმოდგენილ საკითხებს ბათუმის საკრებულო პირველ დეკემბერს, მორიგ სხდომაზე განიხილავს.
სხდომას ბათუმის საკრებულოს ინფრასტრუქტურის განვითარების კომისიის თავმჯდომარე მინდია გოგუაძე უძღვებოდა.