ბათუმის საკრებულოში დღეს გამართულ განათლების, კულტურის, ტურიზმისა და სპორტის საკითხთა კომისიის სხდომაზე კომისიის წევრებმა დღის წესრიგით გათვალისწინებული ხუთი საკითხი განიხილეს. 

კომისიამ იმსჯელა ქალაქ ბათუმში დ. თავდადებულის ქ.N7/რუსთაველის ქ. N17-ში მდებარე სახლზე ღვაწლმოსილი არქიტექტორის ბოგდან კირაკოსიანის უკვდავსაყოფად მემორიალური დაფის განთავსების თაობაზე და მხარი დაუჭირა აღნიშნული საკითხის ხვალინდელ, 31 ოქტომბრის საკრებულოს სხდომაზე განხილვას.
დღის წესრიგით გათვალისწინებულ მომდევნო ორ საკითხზე, მ. ლერმონტოვისა და ალ. გრიბოედოვის ქუჩებისთვის სახელის გადარქმევასთან დაკავშირებით, კომიისიის წევრთა გადაწყვეტილებით, შეიქმნება დროებითი სამუშაო ჯგუფი, რომელიც ქუჩების სახელდებასთან დაკავშირებულ საკითხებზე იმუშვებს და მათ შორის ზემოაღნიშნული ქუჩების სახელის გადარქმევის საკითხსაც განიხილავს.
ქ. ბათუმში არსებულ ნურეთინ ჩარმიკლის ქუჩის სახელის გადარქმევასთან დაკავშირებით საკრებულოში შემოსული პეტიციის განხილვა, კომიისიის წევრთა უმრავლესობის გადაწყვეტილებით, ზუსტად ერთი კვირით გადაიდო. კომისიის თავმჯდომარის ირაკლი პატარიძის განცხადებით, მომავალ კვირაში, სამშაბათს, კომისია კვლავ დაუბრუნდება ამ საკითხს და მასზე პეტიციის ავტორებთან ერთად იმსჯელებს.
კიდევ ერთი საკითხი ეხებოდა ე.წ. ადლიის დასახლებაში საკადასტრო კოდით N05.32.18.031 არსებული ტერიტორიისთვის ქუჩისთვის სახელის მინიჭებას. უსახელო ქუჩის სახელდებასთან დაკავშირებით შემოსული ინიციატივების განხილვის შემდგომ, კომისიის წევრებმა გადაწყვიტეს, რომ აღნიშნულ ქუჩას ცნობილი საზოგადო მოღვაწის რეჯებ ნიჟარაძის სახელი მიენიჭოს, შესაბამისად, საბოლოო გადაწყვეტილების მისაღებად საკითხი გადაეგზავნება გეოგრაფიული ობიექტების სახელწოდებათა სფეროში მოქმედ სამთავრობო კომისიას.
სხდომას განათლების, კულტურის, ტურიზმისა და სპორტის საკითხთა კომისიის თავმჯდომარე ირაკლი პატარიძე უძღვებოდა.