ბათუმის საკრებულოს გადაწყვეტილებები
ბათუმის საკრებულოში დღეს გამართულ სხდომაზე მიღებული გადაწყვეტილებით, ცვლილებები შევიდა მუნიციპალიტეტის საკუთრებაში არსებულ საპრივატიზებო ობიექტების ნუსხასა და პრივატიზაციის გეგმაში. ცვლილების შედეგად საპრივატიზებო ობიექტების ნუსხასა და პრივატიზაციის გეგმას დაემატა თითო ობიექტი;
საკრებულომ, სხდომაზე მიღებული განკარგულებით, ქალაქ ბათუმში, ტბელ აბუსერიძის ქ. N17-ში მდებარე 36,00 კვ.მ არასასოფლო-სამეურნეო დანიშნულების მიწის ნაკვეთი აჭარის ავტონომიურ რესპუბლიკას უსასყიდლოდ, საკუთრებაში გადასცა, შემდგომში მის მიმდებარედ, ერთიან გეოგრაფიულ სივრცეში არსებულ მიწის ნაკვეთებთან გაერთიანებისა და ერთ ლოტად განკარგვის მიზნით;
სხდომაზე მიღებული გადაწყვეტილებით, მუნიციპალიტეტში შეიქმნა ქალაქ ბათუმის მუნიციპალიტეტის ქალთა და ბავშვთა საკითხებზე მომუშავე მუნიციპალური საბჭო და დამტკიცდა მისი დებულება. აღნიშნული დადგენილების მიღებით ძალადაკარგულად გამოცხადდა „ქალაქ ბათუმის მუნიციპალური გენდერული თანასწორობის საბჭოს შექმნისა და დებულების დამტკიცების შესახებ“ საკრებულოს 2018 წლის 27 დეკემბრის №77 დადგენილება, „ქალისა და მამაკაცის თანასწორობის შესახებ“ საქართველოს კანონთან და სხვა ნორმატიულ აქტებთან შესაბამისობაში მოყვანის მიზნით.
საკრებულოს გადაწყვეტილებით, ქალაქ ბათუმში, წმინდა სევერიანე აჭარელის ქუჩიდან იოსებ ნონეშვილის ქუჩის კვეთამდე მონაკვეთს (ნიკოლოზ გოგოლის ქუჩა), ნიკოლოზ გოგოლის ნაცვლად, ქართველი კომპოზიტორისა და სახალხო არტისტის - გიორგი ცაბაძის სახელი მიენიჭა.
საკრებულომ ტექნიკური ხასიათის კორექტირება შეიტანა 2023 წლის 31 მაისის განკარგულებაში, რომელიც ქალაქ ბათუმში ზედა ღელის ქუჩისა და ზედა ღელის შესახვევებისათვის კახი კავსაძის ქუჩისა და კახი კავსაძის შესახვევების სახელის მინიჭების საკითხს უკავშირდებოდა. კერძოდ, ქალაქ ბათუმში, ზედა ღელის ქუჩის დასახლებას N1-დან N50-ის ჩათვლით, ხარვეზის გასწორების შემდგომ ეწოდა კახი კავსაძის ქუჩის III შესახვევი;
საკრებულომ მხარი დაუჭირა ქალაქ ბათუმში, მიხეილ შარაშიძის V ჩიხის ქუჩად ჩამოყალიბების საკითხს და აღნიშნული ქუჩისთვის მსოფლიოში ცნობილი ქართველი კომპოზიტორის, სსრკ-ის სახალხო არტისტის, შოთა რუსთაველის სახელობის სახელმწიფო პრემიის ლაურეატის და ღირსების ორდერის კავალერის გია ყანჩელის სახელის მისანიჭებლად გამონაკლისის დაშვება, გარდაცვალების ვადის შეზღუდვიდან გამომდინარე, მიზანშეწონილად მიიჩნია;
საკრებულომ ტექნიკური ხასიათის ცვლილებები შეიტანა მუნიციპალიტეტის გარკვეულ ტერიტორიებზე დამტკიცებულ განაშენიანების დეტალურ გეგმებში, რაც საკრებულოს მიერ დამტკიცებულ განაშენიანების გეგმებზე არსებით გავლენას არ იქონიებს.