ბათუმის მუნიციპალიტეტის მერიამ საკრებულოს მიერ გასულ თვეში მიღებული სამართლებრივი აქტი სისრულეში მოიყვანა და დღეს 15 მრავალშვილიან ოჯახს ბინები საკუთრებაში გადასცა.
ბინების ოფიციალურად გადაცემის ცერემონია მუნიციპალიტეტის შენობაში შედგა და მასში ქალაქის მერის მოვალეობის შემსრულებელთან არჩილ ჩიქოვანთან ერთად, ბათუმის საკრებულოს თავმჯდომარე სულიკო თებიძე, საკრებულოს თავმჯდომარის მოადგილე ნატალია ზოიძე და ბათუმის მერის მოადგილე ლელა სურმანიძე მონაწილეობდნენ.
მერიის პროგრამის ფარგლებში, საცხოვრებელი ბინები საჩუქრად იმ ოჯახებს გადაეცათ, რომლებსაც 6 და მეტი შვილი ჰყავთ.
აღნიშნული ოჯახების ბინებით დაკმაყოფილება მას შემდეგ გახდა შესაძლებელი, რაც არჩილ ჩიქოვანის ინიციატივით მრავალშვილიანი ოჯახების საცხოვრებლით უზრუნველყოფის პროგრამაში ბათუმის საკრებულომ ცვლილება შეიტანა. მანამდე, მერიის პროგრამის ფარგლებში, ბინების გადაცემა 7 და მეტ შვილიანი ოჯახებისთვის იყო შესაძლებელი.
ოჯახებს, რომლებმაც პროგრამის კრიტერიუმები დაკმაყოფილეს, საჩუქრად 100-დან 130 კვმ-მდე გარემონტებული საცხოვრებელი ფართი გადაეცათ.