საკრებულოს თავმჯდომარე სულიკო თებიძე და მაჟორიტარი დეპუტატი მიხეილ ართმელაძე, დღეს ქალაქის მერთან, ლაშა კომახიძესთან ერთად გონიო-კვარიათის ადმინისტრაციულ ერთეულში მოსახლეობას შეხვდნენ.

შეხვედრა ადმინისტრაციული ერთეულის სერვისცენტრში გაიმართა, რომელსაც საკრებულოს წარმომადგენლებთან ერთად მერიის შესაბამისი სამსახურებისა და აიპების ხელმძღვანელი პირები ესწრებოდნენ.
მუნიციპალიტეტის პირველმა პირებმა მოსახლეობას აღნიშნულ უბანში მიმდინარე ინფრასტრუქტურული სამუშაოების შესახებ მიაწოდეს ინფორმაცია და ასევე, განიხილეს ისეთი აქტუალური საკითხები, რომლებიც კონკრეტულ უბანში სასწრაფო რეაგირებას მოითხოვს. გონიო -კვარიათის ადმინისტრაციული ერთეული ტურისტული ზონაა და აქტიურ სეზონთან დაკავშირებით, მოსახლეობის მოთხოვნებიც ძირითადად აღნიშნულ თემას ეხებოდა. როგორც შეხვედრაზე ითქვა, ყველა პრობლემური საკითხი ეტაპობრივად, დაჩქარებულ ვადებში გადაწყდება.