N: 23

თარიღი: 2014-08-29

ტიპი: დადგენილება

სფერო: სამართლებრივი აქტები

ქალაქ ბათუმის მუნიციპალიტეტის საკრებულო

დ ა დ გ ე ნ ი ლ ე ბ ა №23

 

2014 წლის 29 აგვისტო

ქალაქი ბათუმი

  

ქალაქ ბათუმის მუნიციპალიტეტის მერიის

შიდა აუდიტის სამსახურის დებულების დამტკიცების შესახებ

 

 

საქართველოს ორგანული კანონის „ადგილობრივი თვითმმართველობის კოდექსი“-ს 24-ე მუხლის პირველი პუნქტის „გ.ბ“ ქვეპუნქტის, 54-ე მუხლის პირველი პუნქტის „ა.ბ“ ქვეპუნქტის და „ნორმატიული აქტების შესახებ“ საქართველოს კანონის 25-ე მუხლის პირველი პუნქტის „ბ“ ქვეპუნქტის შესაბამისად, ქალაქ ბა­თუ­მის მუნიცი­პა­ლიტეტის საკრებულო  ა დ გ ე ნ ს :

 1. დამტკიცდეს ქალაქ ბათუმის მუნიციპალიტეტის მერიის შიდა აუდიტის  სამსახურის თანდართული დებულება.

2. ამ დადგენილების ძალაში შესვლისთანავე ძალადაკარგულად გამოცხადდეს „თვით­მმართველი ქალაქის - ბათუმის მერიის შიდა აუდიტის სამსახურის დებულების დამტკიცების შესახებ“ თვითმ­მართველი ქალაქის - ბათუმის საკრებულოს 2011 წლის 31 აგვისტოს #48 დად­­გენილება (საქართველოს საკანონმდებლო მაცნე (www.matsne.gov.ge), 06/09/2011, სარე­გის­ტრაციო კოდი: 010260020.35.132.016075).

3. ეს დადგენილება ამოქმედდეს 2014 წლის 5 სექტემბრიდან.

  

 

 

        საკრებულოს თავმჯდომარე                                                     ირაკლი ჭეიშვილი

 

 

 

 

დანართი

„ დ ა მ ტ კ ი ც ე ბ უ ლ ი ა “

ქალაქ ბათუმის მუნიციპალიტეტის

საკრებულოს დადგენილება

     2014  წლის 29 აგვისტო, N23

 

 

ქალაქ ბათუმის მუნიციპალიტეტის მერიის

შიდა აუდიტის სამსახურის დებულება

 

თავი I. ზოგადი დებულებანი

 

 

მუხლი 1. ზოგადი დებულებანი

 

1. ეს დებულება განსაზღვრავს ქალაქ ბათუმის მუნიციპალიტეტის მერიის შიდა აუდი­ტის სამსახურის (შემდგომში – სამსახური) სამართლებრივ სტატუსს, სტრუქტურას, უფლე­ბა­მო­სილებასა და ანგარიშვალდებულებას, ასევე აწესრიგებს მის საქმიანობასთან დაკავ­შირე­ბულ სხვა საკითხებს.

2 სამსახური არის ქალაქ ბათუმის მუნიციპალიტეტის მერიის სტრუქტურული ერ­თეუ­ლი, რომ­ელიც უზრუნველყოფს ქ. ბათუმის მუნიციპალიტეტის მერიის და ქ. ბათუმის მუ­­ნიციპა­ლი­ტეტის მერის მიერ დაფუძნებული ან/და წილობრივი მონაწილეობით არსებული იური­დიული პირებისა და მათი მოსამ­სახურეების (შემდგომში – შიდა აუდიტის ობიექტები) საქმიანობის შიდა კოტროლის, კანო­ნიერე­ბისა და ეფექტურობის მონიტორინგის განხორ­ციე­ლებას.

3. სამსახური შექმნილია საქართველოს ორგანული კანონის „ადგილობრივი თვით­მმარ­თ­ვე­ლობის კოდექსი“-ს, „სახელმწიფო შიდა ფინანსური კონტროლის შესახებ“ საქართველოს კანონისა და ქალაქ ბათუმის მუნიციპალიტეტის მერიის დებულების შე­საბამისად.

4. სამსახურის სრული დასახელებაა: ქალაქ ბათუმის მუნიციპალიტეტის მერიის შიდა აუდიტის სამსახური.

5. სამსახური შედგება სამსახურის უფროსის და თანამშრომლებისაგან.

6. სამსახური თავის საქმიანობაში ხელმძღვანელობს საქართველოს კონსტიტუციით, საქარ­თველოს ორგანული კანონით „ადგილობრივი თვითმმართველობის კოდექსით“, „სახელ­მწიფო შიდა ფინანსური კონტროლის შესახებ“ საქართველოს კანონით, „საჯარო სამსახურის შესახებ“ საქართველოს კანონით, „საჯარო სამსახურში ინტერესთა შეუთავ­სებ­ლობისა და კორუფციის შესახებ“ საქართველოს კანონით, ამ დებულებითა და სხვა სამარ­თლებრივი აქტებით.

7. სამსახური უშუალოდ ექვემდებარება ქ. ბათუმის მუნიციპალიტეტის მერს (შემ­დგომში – მერი) და ანგარიშვალდებულია მის წინაშე. დაუშვებელია მის საქმიანობაში სხვა თანამდებობის პირთა ნებისმიერი ფორმით ჩარევა.

8. სამსახური არ წარმოადგენს დამოუკიდებელ საბიუჯეტო დაწესებულებას, არ აქვს დას­რუ­ლებული ბალანსი და ანგარიში.

9. სამსახურის იურიდიული მისამართია: ქ. ბათუმი, ლუკა ასათიანის ქ. №25.

10. სამსახურს აქვს ბეჭედი საკუთარი დასახელების აღნიშვნით. სამსახური იყენებს მერიის ტიტულიან ბლანკს, საკუთარი დასახელების დამატების აღნიშვნით.

 

 

მუხლი 2. სამსახურის საქმიანობის პრინციპები

 

სამსახურის საქმიანობის პრინციპებია:

ა) მოქალაქეთა კონსტიტუციური უფლებებისა და თავისუფლებების დაცვა;

ბ) კანონის წინაშე თანასწორობა;

გ) საქმიანობა კანონმდებლობის საფუძველზე;

დ) დისკრეციული უფლებამოსილების განხორციელება კანონმდებლობის საფუძველ­ზე;

ე) საქმიანობის განხორციელება საჯარო და კერძო ინტერესების ურთიერთ­შე­წონას­წორებით;

ვ) მიუკერძოებლობა;

ზ) საქვეყნოობა და საჯაროობა.

 

თავი II. სამსახურის ამოცანები და ფუნქციები

 

მუხლი 3. სამსახურის ფუნქციები

 1. სამსახურის ძირითადი ამოცანები და ფუნქციებია:

 

ა) არსებული რისკების დადგენა, გამოვლენა, რისკების მართვისათვის შემუშავებული შიდა კონტროლის სისტემების ადეკვატურობისა და ეფექტიანობის გამოკვლევა და შეფასება;

 ბ) საქმიანობის ეფექტიანობის ხელშეწყობა, ფინანსური მართვისა და კონტროლის სისტემის ადეკვატურობისა და ეფექტიანობის შეფასება;

გ) საქმიანობის ეკონომიურობის, ეფექტიანობისა და პროდუქტიულობის გაზრდის მიზნით მერის ან/და შიდა აუდიტის ობიექტისათვის რეკომენდაციების წარდგენა, შესასრუ­ლებ­ლად სავალდებულო ინსტრუქციების პროექტების შემუშავება და დასამტკიცებლად მერისათვის წარდგენა;

დ) საქმიანობის საქართველოს კანონმდებლობასთან შესაბამისობის შეფასება და მონი­ტო­რინგი;

ე) ფინანსური და სხვა ინფორმაციის სანდოობის, სიზუსტისა და სისრულის შეფასება;

ვ) არქივების, სხვა რესურსებისა და ინფორმაციის ადეკვატურად დაცულობის შეფასება;

ზ) სახსრების, სხვა მატერიალური ფასეულობების, ქონებრივი ღირებულების, არამატე­რიალური სიკეთეების ხარჯვის, გამოყენების, მართვისა და დაცვის კანონიერების, მიზნობ­რიობის, მიზანშეწონილობის, ეკონომიურობისა და შედეგობრიობის შესწავლა და ანალიზი, ასევე ბუღალტრული აღრიცხვისა და ფინანსური ანგარიშების შემოწმება მოქმედ სტანდარ­ტებთან მათი შესაბამისობის დადგენის მიზნით;

თ) რესურსების გამოყენების შეფასება, ეკონომიურობის, ეფექტურობის, ეფექტიანობის კუთხით და რეკომენდაციების შემუშავება, ხარჯთ-ეფექტურობის გასაუმჯობესებლად;

ი) თავის კომპეტენციაში შემავალ საკითხებზე, შიდა კონტროლის, შიდა აუდიტისა და მონიტორინგის განხორციელება;

კ) საქართველოს კანონმდებლობის მოთხოვნათა დაცვის კონტროლი;

ლ) ფუნქციონირებისა და მართვის პროცედურების მწარმოებლურობის, ეფექტიანობისა და ეკონომიურობის გაზრდის მიზნით რეკომენდაციებისა და ინსტრუქციების შემუშავება;

მ) შიდა აუდიტის ობიექტის კონტრაქტორების, დაფინანსებაზე მყოფი სხვა პირების მიერ ხელშეკრულების პირობების შესრულების ან/და შიდა აუდიტის ობიექტისაგან მიღე­ბული სახსრების კანონიერად ხარჯვის მონიტორინგის/აუდიტის განხორციელება;

ნ) საქმიანობის მოსალოდნელი დარღვევების ან/და სამსახურებრივი გადაცდომების პრევენცია, მათი რისკ-ფაქტორების გამოვლენა და ანალიზი;

ო) თანამშრომლების მიერ სამართალდარღვევათა და სამსახურებრივ გადაცდომათა ჩადენის ფაქტების გამოკვლევა სამსახურებრივი შემოწმების ჩატარების გზით, ხელშემწყობი მიზეზების დადგენა და მათი აღმოფხვრის მიზნით შესაბამისი რეკომენდაციების გაცემა, ინსტრუქციების პროექტების შემუშავება და დასამტკიცებლად მერისთვის წარდგენა;

პ) მერიის მოსამსახურეთა ინტერესთა შეუთავსებლობის ფაქტების გამოვლენა,მათ მიერ სამსახურებრივი ეთიკის წესების შესრულებაზე კონტროლისა და ზედამხედველობის განხორციელება;

ჟ) საქმიანობის საჯაროობისა და გამჭვირვალობის უზრუნველყოფა, საზოგადოებრივი კონტროლის მექანიზმების ჩამოყალიბების ხელშეწყობა და მხარდაჭერა, კანონიერების დაც­ვის სფეროში საზოგადოების მხარდაჭერის მოპოვება;

რ) კომპეტენციას მიკუთვნებული საქმიანობის განხორციელების შედეგების გათვალის­წი­ნებით შიდა აუდიტის ობიექტების საქმიანობის გაუმჯობესების მიზნით შესასრულებლად სავალდებულო ინსტრუქციების პროექტების შემუშავება და მერისათვის დასამტკიცებლად წარდგენა;

ს)  მერის ცალკეული დავალებების შესრულება.

2. სამსახური აწარმოებს სამუშაო დოკუმენტაციის (მიმოწერა, ანგარიშები, რეკომენდა­ციები, შემუშავებული პროექტები, სხვა სახის კორესპონტენცია და ა.შ.) სისტემატიზაციას  (ფიზიკური ან/და ელექტრონული ფორმით, ქრონოლოგიური, თემატური ან სხვა ნიშნით) და შენახვას. დოკუმენტაციის სისტემატიზაციის მიზანია საჭიროების შემთხვევაში,  ჩატარე­ბუ­ლი აუდიტორული შემოწმებისა და მონიტორინგის, სამსახურებრივი შემოწმების შედეგების ამსახველი და სხვა ცალკეული დოკუმენტის დროული მოძიება, სამსახურებრივი ანგარიშების მომზადებისა და სტატისტიკის წარმოების გამარტივება, მონიტორინგისა და სხვა ფუნქცია-მოვალეობების შესრულების ხელშეწყობა და გაადვილება;

 

მუხლი 4. სამსახურის მიერ უფლებამოსილების განხორციელება

 1. დაკისრებულ ფუნქციებს სამსახური ახორციელებს შიდა აუდიტისა და მონიტო­რინგის განხორციელების მეშვეობით.

2. რისკების შეფასების საფუძველზე სამსახური ამზადებს სტრატეგიულ და ყოველ­წლიურ შიდა აუდიტის გეგმებს მერთან შეთანხმებით:

ა) შიდა აუდიტის სტრატეგიულ გეგმას შეიმუშავებს სამსახურის უფროსი და მას დასამ­ტკიცებლად წარუდგენს მერს. შიდა აუდიტის სტრატეგიული გეგმა გამომდინარეობს სამსა­ხურის გრძელვადიანი მიზნებიდან, მოიცავს სამწლიან პერიოდს და განსაზღვრავს შიდა აუდიტის სფეროში სტრატეგიული განვითარების მიმართულებებს;

 ბ) შიდა აუდიტის წლიური გეგმა ეფუძნება შიდა აუდიტის სტრატეგიულ გეგმას და შეიცავს კონკრეტულ შიდა აუდიტორულ შემოწმებებს. შიდა აუდიტის წლიურ გეგმას ადგენს სამსახურის უფროსი და მას დასამტკიცებლად წარუდგენს მერს.

3. სამსახურის უფროსი უფლებამოსილია, საჭიროების შემთხვევაში, მერთან შეთან­ხმებით, გამოსცეს ბრძანება არაგეგმური შიდა აუდიტორული შემოწმების ჩატარების შესახებ.

4. სამსახურის უფროსი შეიმუშავებს და ამტკიცებს შიდა აუდიტის ობიექტის შიდა აუდიტორული შემოწმების ინდივიდუალურ გეგმას, რომლის საფუძველზეც ტარდება თითო­ეული შიდა აუდიტორული შემოწმება.

5. რეკომენდაციების შესრულების ადეკვატურობის, ეფექტიანობისა და დრო­ულო­ბის შესაფასებლად შიდა აუდიტის წლიურ გეგმაში გათვალისწინებული უნდა იქნეს გაცე­­მული რეკომენდაციების შესრულების მონიტორინგი.

6.  შიდა აუდიტის სტრატეგიულ და წლიურ გეგმებში ნებისმიერი ცვლილება ხორ­ცი­ელ­დება შიდა აუდიტის სუბიექტის უფროსის წინადადებით, რისკის შეფასების საფუძ­ველზე.

7. შიდა აუდიტის წლიური და სტრატეგიული გეგმები მტკიცდება დაგეგმილი პე­რი­ოდის დაწყებამდე და ისინი (ყველა განხორციელებულ ცვლილებასთან ერთად)    ეგზავ­ნება ჰარმონიზაციის ცენტრს.

8. შიდა აუდიტი უნდა შედგებოდეს შემდეგი ეტაპებისგან:

ა) აუდიტის დაგეგმვა;

ბ) აუდიტის განხორციელება;

გ) ანგარიშგება;

დ) გაცემული რეკომენდაციებისა და დამტკიცებული ინსტრუქციების შემდგომი შესრუ­ლების მონიტორინგი.

9. შიდა აუდიტისა და მონიტორინგის განხორციელების საფუძველი შეიძლება იყოს სამსახურის სამუშაო გეგმით გათვალისწინებული საკითხები, მერის დავალება ან/და სამსა­ხურის უფროსის ინდივიდუალური ადმინისტრაციულ-სამართლებრივი აქტი, შიდა აუდი­ტო­რული დავალებები ან მითითებები.

10. სამსახურის უფროსის მიერ შემუშავებული აუდიტორული შემოწმების ინდივი­დუალური გეგმით განისაზღვრება შიდა აუდიტის მოქმედების სფერო, ამოცანები, ხან­გრძლი­ვობა, რესურსების განაწილება, შიდა აუდიტის განხორციელების მეთოდები, ფარგლები, აუდიტის სახე, აუდიტორთა ჯგუფის პერსონალური შემადგენლობა, შიდა აუდიტის ობიექტის სახელწოდება და სხვა.

11. შიდა აუდიტორული დავალების საფუძველზე განსახორციელებელი შიდა აუდიტი შესაძლებელია იყოს შემდეგი სახის:

ა) სისტემური აუდიტი;

ბ) შესაბამისობის აუდიტი;

გ) ეფექტიანობის აუდიტი;

დ) ფინანსური აუდიტი.

12. შიდა აუდიტორული შემოწმების შემდეგ სამსახური ადგენს შიდა აუდიტორული ანგარიშის პროექტს, რომელიც ასახავს შიდა აუდიტის შედეგებს და მოიცავს შიდა აუდიტის პროცესსა და გამოვლენილ ფაქტებს, მათ ანალიზს და მათ საფუძველზე შემუშავებულ რეკო­მენდაციებს.

13. შიდა აუდიტორული ანგარიშის პროექტი გასაცნობად წარედგინება შიდა აუდიტის ობიექტის ხელმძღვანელს, რომელიც პროექტის მიღებიდან არაუგვიანეს 5 სამუშაო დღის ვადაში წერილობით წარმოადგენს თავის მოსაზრებებს. ამის შემდეგ სამსახურის უფროსი აყალიბებს საბოლოო სახით შიდა აუდიტორულ ანგარიშს, საჭიროების შემთხვევაში -ინსტრუქციების პროექტებს, მათი შესრულების სამოქმედო გეგმას, გასცემს რეკომენდაციებს და წარუდგენს მერს.

14. შიდა აუდიტის ობიექტის უფროსი ვალდებულია სამსახურს წარუდგინოს შიდა აუდიტორული ანგარიშის შესაბამისად შემუშავებული რეკომენდაციებისა და ინსტრუქ­ცი­ების შესრულების შესახებ ინფორმაცია.

15. სამსახურის უფროსი მერსა და უფლებამოსილ ორგანოებს წარუდგენს შიდა აუდი­ტის წლიურ ანგარიშს.

16. კანონიერების დაცვის მონიტორინგს სამსახური ახორციელებს ქ. ბათუმის მუნიციპა­ლი­ტეტის მერიის სისტემის მოსამსახურეთა მიერ ჩადენილი სამართალდარღვევის ან სამსა­ხურებრივი გადაცდომის შესახებ, სხვა ადმინისტრაციული ორგანოებიდან მიღებული შეტყო­ბინებების, მასმედიისა და მასობრივი ინფორმაციის საშუალებით გამოქვეყნებული მასა­ლების, ცხელი ხაზითა და ელექტრონული ფოსტით მიღებული ინფორმაციების მოკვლევისა და შესაბამისი რეაგირების მოხდენის გზით.

17. შიდა აუდიტის ობიექტის მოსამსახურეთა მიერ სამსახურებრივი გადაცდომის ჩადე­ნის ფაქტებზე სამსახურის უფროსის გადაწყვეტილებით ტარდება სამსახურებრივი შემოწმება, შემოწმების შედეგების შესახებ დგება დასკვნა და წარედგინება შიდა აუდიტის ობიექტის ხელმძღვანელსა და მერს.

18. მონიტორინგი ხორციელდება ასევე აუდიტის შედეგად გამოვლენილ დარღვევებზე შიდა აუდიტის ობიექტის მხრიდან განხორციელებული რეაგირების მდგომარეობის შესახებ, შესაბამისი ინფორმაციის მოპოვების მეშვეობით.

19. სამსახური შიდა აუდიტისა და მონიტორინგის, ასევე სამსახურებრივი შემოწმების შედეგად, დანაშაულის ნიშნების შემცველი ქმედების გამოვლენის შემთხვევაში, ინფორმაციას წარუდგენს მერს შესაბამისი რეაგირების მიზნით.

20. შიდა აუდიტისა და მონიტორინგის განხორციელების მიზნით, ასევე სამსახუ­რებ­რივი შემოწმების წარმოებისას, სამსახურის მართლზომიერი მოთხოვნა ან დავალება სავალდებულოა შესასრულებლად და მათი შეუსრულებლობა განიხილება მოსამსახურის დისციპლინური პასუხისმგებლობის საფუძვლად.

21. შიდა აუდიტის ობიექტი (ობიექტის მოსამსახურე) ვალდებულია შიდა აუდიტის ან/და მონიტორინგის განხორციელების პროცესში წერილობითი ან/და ზეპირი ფორმით სამსახურს წარუდგინოს ახსნა-განმარტება.

22. სამსახური თავის ფუნქციების შესრულების დროს უფლებამოსილია:

ა) საკუთარი კომპეტენციის ფარგლებში, გამოითხოვოს ნებისმიერი დოკუმენტი და ინფორმაცია (როგორც მატერიალური, ისე არამატერიალური სახით არსებული), მოსთხოვოს და მიიღოს შესაბამისი ახსნა-განმარტება მერიის სისტემაში შემავალი ყველა რგოლის მუშაკებისა და თანამდებობის პირებისაგან, ასევე ქ. ბათუმის მუნიციპალიტეტის მერიის იურიდიული პირების მოსამსახურეთაგან;

ბ) კანონმდებლობით დადგენილი წესით გამოიყენოს ქ. ბათუმის მუნიციპალიტეტის მერიის სისტემაში არსებული მონაცემთა ბაზები; 

გ) მონიტორინგისა და შიდა აუდიტის შედეგებზე დაყრდნობით, უფლებამოსილ პირს მიმართოს წინადადებით გადაცდომის ჩამდენი პირის მიმართ დისციპლინური პასუხისმგებ­ლობის ღონისძიების გამოყენების შესახებ;

დ) შიდა აუდიტის ობიექტების ხელმძღვანელებს მიმართოს მითითებით უკანონო ქმედებათა დროული აღმოფხვრისა და პრევენციის მიზნით შესაბამისი ღონისძიებების გატა­რების მოთხოვნით;

ე) საჭიროების შემთხვევაში მოიწვიოს შესაბამისი დარგის სპეციალისტები, სათანადო წესით დაუკვეთოს შესაბამის იურიდიულ პირებს ექსპერტიზის ან/და სხვა სახის კვლევების ჩატარება;

ვ) სამსახურის ფუნქციების შესრულების მიზნით განახორციელოს სხვა ქმედებები.

  

თავი III. სამსახურის უფროსი და სამსახურის თანამშრომლები

 

მუხლი 5. სამსახურის უფროსი და მისი უფლებამოსილებები

 

1. სამსახურს ხელმძღვანელობს სამსახურის უფროსი, რომელსაც საქართველოს ორგა­ნული კანონის „ადგილობრივი თვით­მმა­რ­­თველობის კოდექსის“ შესაბამისად თანამდებობაზე ნიშნავს და თანამდებობიდან ათა­ვი­სუ­ფლებს მერი.

2. სამსახურის უფროსი:

ა) ხელმძღვანელობს და წარმართავს სამსახურის საქმიანობას;

ბ) იღებს გადაწყვეტილებებს სამსახურის კომპეტენციას მიკუთვნებულ საკითხებზე;

გ) მოქმედებს სამსახურის სახელით და წარმოადგენს სამსახურს სხვა ორგანოებთან ურთიერთობისას;

დ) განსაზღვრავს შიდა აუდიტის განხორციელების სახეს, მოქმედების სფეროს, შიდა აუდიტის განხორციელების სიხშირესა და მუშა ჯგუფის წევრების რაოდენობას;

ე) შეიმუშავებს და დასამტკიცებლად წარუდგენს მერს შიდა აუდიტის სტრატეგიულ და წლიურ გეგმებს;

ვ) კოორდინაციას უწევს შიდა აუდიტორთა საქმიანობას და ანაწილებს მათ შორის ფუნქციებს;

ზ) ახორციელებს მონიტორინგს შიდა აუდიტის წლიური გეგმის შესრულებაზე და სამსახურის მიერ შიდა აუდიტის მეთოდოლოგიის გამოყენებაზე;

თ) უზრუნველყოფს ფინანსური მართვისა და კონტროლის სისტემის, ასევე ქ. ბათუმის მუნიციპალიტეტის მერიის სისტემის სტრუქტურისა და ფუნქციების შეფასებას;

ი) მონიტორინგს უწევს შიდა აუდიტის ობიექტისათვის გაცემული რეკომენდაციებისა და ინსტრუქციების შემდგომ შესრულებას;

კ) პასუხს აგებს სამსახურის ქონების დაცვასა და ჯეროვნად გამოყენებაზე;

ლ) ახორციელებს სამსახურებრივ ზედამხედველობას სამსახურის თანამშრომელთა საქმიანობის კანონიერებასა და მიზანშეწონილობაზე;

მ) სამსახურის თანამდებობის პირებს აძლევს შესაბამის დავალებებსა და მითითებებს და აკონტროლებს მათ შესრულებას;

ნ) დადგენილი წესით მერს წარუდგენს ანგარიშს სამსახურის მიერ გაწეული საქმიანო­ბის შესახებ;

ო) კომპეტენციის ფარგლებში გასცემს დასკვნებს, წინადადებებს, რეკომენდაციებს, სა­ვალ­დებულო მითითებებს;

პ) თავისი უფლებამოსილების ფარგლებში გამოს­ცემს ინდივიდუალურ ადმინისტ­რა­ციულ-სამართლებრივ აქტებს;

ჟ) უფლებამოსილია ცალკეული უფლებამოსილების განხორციელების მიზნით გამოყოს პასუხისმგებელი პირი ან პირთა ჯგუფი;

რ) შუამდგომლობს იმ სახსრებისა და მატერიალური ფასეულობების გამოყოფის თაობაზე, რომელიც საჭიროა სამსახურის ამოცანების შესასრულებლად;

ს) მერს წარუდგენს წინადადებებს სამსახურის საკადრო საკითხებთან დაკავშირებით, მოსამსახურეთა წახალისებისა და მათთვის დისციპლინარული პასუხისმგებლობის დაკისრე­ბის, მოსამსახურეთა მიერ მორიგი და დამატებითი შვებულებების გამოყენების, მოსამ­სახურეთა სამსახურეობრივი მივლინებების, კვალიფიკაციის ამაღლებისა და სწავლების შესახებ;

ტ) ესწრება მერის თათბირებს;

უ) უშუალოდ იხილავს სახელმწიფო საიდუმლოების შემცველ საკითხებს, ასეთის უფლებამოსილების არსებობის შემთხვევაში;

ფ) სამსახურის ერთ-ერთ თანამშრომელს ავალებს საქმისწარმოების ფუნქციის შესრუ­ლებას, რომელიც ასევე ახორციელებს სამსახურებრივი დოკუმენტაციის  სისტემატიზაციას.

ქ) ახორციელებს კანონმდებლობითა და ამ დებულებით განსაზღვრულ სხვა უფლება­მოსილებებს.

3. სამსახურის უფროსი უფლებამოსილია უშუალოდ განახორციელოს სამსახურისადმი ან/და სამსახურის სტრუქტურული ქვედანაყოფისადმი მიკუთვნებული ნებისმიერი უფლება­მო­სილება.

4. სამსახურის უფროსი პასუხისმგებელი და ანგარიშვალდებულია სამსახურის საქ­მია­ნო­ბისათვის მერის წინაშე.

5. სამსახურის უფროსის არყოფნისას, უფროსის მიერ უფლებამოსილების განხორ­ცი­ელე­ბის შეუძლებლობის შემთხვევაში ან თანამდებობიდან მისი განთავისუფლებისას უფროსის მოვა­ლეობის შესრულება მერის ბრძანების საფუძველზე ეკისრება ერთ-ერთ მთავარ სპე­ციალისტს.

6. სამსახურის უფროსის თანამდებობიდან გათავისუფლების და სამსახურებრივი ურთიე­რ­თო­ბის შეწყვეტის, აგრეთვე, სამსახურებრივი ურთიერთობის შეჩერების საფუძვლები განი­საზ­ღ­ვ­რე­ბა საქართველოს ორგანული კანონით „ადგილობ­რი­ვი თვითმმართველობის კოდექსის“ შე­სა­ბა­მი­სად.

                                         

 მუხლი 6 . სამსახურის თანამშრომლების (შიდა აუდიტორების) უბლება-მოვალეობები

1. სამსახურის თანამშრომელი (შიდა აუდიტორი) უფლებამოსილია შიდა აუდი­ტო­რუ­ლი შემოწმების განხორციელების პროცესში მიიღოს მისთვის საჭირო ყველა ინფორმაცია, დო­კუ­მენტი და ხელი მიუწვდებოდეს მონაცემთა ბაზებზე, მიუხედავად მათი ფორმისა (ელექ­ტ­რო­ნული ვერსია და სხვა). შიდა აუდიტორს ასევე უფლება აქვს, შიდა აუდიტის ობიექტს მოს­თ­ხოვოს დოკუმენტის სახელმწიფო ენაზე წარდგენა, გადაიღოს დოკუმენტის ასლები და სხვა, გარდა საქართველოს კანონმდებლობით დადგენილი შეზღუდვებისა.

2. მერიის თანამშრომლები ვალდებული არიან თავიანთი კომ­პეტენციის ფარგლებში სა­თა­ნადო დახმარება გაუწიონ შიდა აუდიტორს შიდა აუდიტორული შემოწმების განხორ­ციე­ლე­ბის პროცესში.

3. შიდა აუდიტორი ვალდებულია:

ა) დაიცვას შიდა აუდიტის სუბიექტის დებულება, შიდა აუდიტის სტანდარტები, შიდა აუ­დიტორთა ეთიკის კოდექსი, შიდა აუდიტის მეთოდოლოგია და შიდა აუდიტის მარე­გუ­ლი­რებელი სხვა სამართლებრივი აქტები;

ბ) შიდა აუდიტორული შემოწმების დაწყებამდე შიდა აუდიტის ობიექტს წარუდგინოს აუდიტორული შემოწმების ინდივიდუალური გეგმა;

გ) უზრუნველყოს შიდა აუდიტის ობიექტის პერსონალური მონაცემების, სახელმწიფო, სამსახურებრივი და კომერციული საიდუმლოებების დაცვა საქართველოს კანონმდებლობით დადგენილი წესით და არ გაამჟღავნოს ის ინფორმაცია, რომელიც მისთვის ცნობილი გახდა თა­ვისი საქმიანობის განხორციელებისას ან მასთან დაკავშირებით, გარდა იმ შემთხვევისა, რო­დესაც იგი გამომდინარეობს შიდა აუდიტორული შემოწმების მიზნიდან ან/და გათვალის­წი­ნებულია შესაბამისი კანონმდებლობით;

დ) მერის თანხმობის გარეშე არ გახადოს საჯარო შიდა აუდიტორული შემოწმების შე­დე­გები, გარდა საქართველოს კანონმდებლობით გათვალისწინებული შემთხვევებისა.

 

მუხლი 7 . სამსახურის სტრუქტურაში არსებული თანამდებობები

 1. ამ დებულების შესაბამისად სამსახურის საშტატო ნუსხით სამსახურის შემადგენ­ლობაში შეიძლება დგინ­დება შემდეგი თანამდებობები:

ა) სამსახურის უფროსი;

ბ) მთავარი სპეციალისტი;

გ) წამყვანი სპეციალისტი;

გ) უფროსი სპეციალისტი;

დ) სპეციალისტი.                            

2. სამსახურის თანამშრომლებს შორის ფუნქცია-მოვალეობებს ანაწილებს სამსახურის უფროსი.

 3. აუცილებლობის შემთხვევაში, სამსახურის უფროსის შუამდგომლობითა ან/და მერის გადაწყვეტილებით, შესაძლებელია შესაბამისი ვადითა და შრომითი ხელშეკრულების საფუძველზე მოწვეული იქნენ ცალკეული სპეციალისტები.

 

თავი IV. დასკვნითი დებულებანი

 

მუხლი 8. სხვა დებულებები

 წინამდებარე დებულებაში ცვლილებების შეტანა ხდება საკრებულოს დად­გე­ნი­ლე­ბით, მოქ­მე­დი კანონმდებლობით დადგენილი წესით.